أنا والسحاب

أنا والسحاب ..

 أنتيم أوى ..

 بنخاف على خوف بعضنا ..

 بيحسّ فيّا الخوف .. يخاف ..

 يلاقينى غارق ف الهموم ..

 يصنع من الغيمات رسوم ..

 أحمال بتسكن ع الكتاف ..

 بضحك .. واروحله الاقيه ضِحِك ..

 افرح اشوفه باجنحة ..

 احزن .. يدمّع بالمطر ..

 بلقاه أمان وقت الخطر ..

 ضعفى معاه ملهوش أثر ..

 ضعفى معاه .. بيكون قوى ..

 أنا والسحاب .. أنتيم أوى

مفيش حاجة !

محتاج تفضفض بالوجع !

لكن جبانك ..

أقوى من ..

حاجتك لدمعات الإرتياح

خوفك .. إيدين تمسك إيديك

ويطبطبولك ع الهموم

ويمسحولك دمعتك

فتحسّ .. عطف بيكسرك

آهين ..

آهة .. من الهمّ اللى مش شايف مداه

وآهة من الشفقة اللى بتقررّ بأنّك

صرت عالة على الحياة

    كاره أنا كلّ البشر

ودموع هموم الدّنيا بتريّح ساعات

لكن شعور العطف بيجرّح أوى

وانت لهمومك مِحتوىِ

ومخبّى جوّاك الكسور

خايف لزرعات الكرامة المُنهكة

جوّاك .. تبور

فبتتكتم ..

وبتتكتم ..

لحدّ ما عدت مش قادر تقول .. حاجة

وفيك .. مُستعمَرات حاجة

واديك أصبحت مش موجود

وسؤال بيتكرّر كتير

من ناس كتير

الحيطة .. والشبّاك

كبّاية القهوة .. القلم

حاسس بإيه ؟!!

محتاج ؟؟

- مفيش حاجة

- مفيش حاجة

    قبل النهاية .. بمشهدين

جوّاك رميت نظرة فضول

فلقيت صدى جوّاك

يجاوب بارتخاء ..

- مفيش حاجة

- مفيش حاجة

    وبدل ما فضفضت الوجع

 فضّيت حياتك م الشعور 

 

Flash Back

.. أنا لـسّـا بسمع كُلّ يوم فيروز

  .. واحسّك قاعدة جمبى بتسمعى

 .. أنا لـسّـا فاكِر صوتِك المهزوز

  " !لمّا تقوليلى : " خلاص كِدة 

وتدمّعى .. !ا