مــلاك الموت

خبّط شعورى بالانكسار
على باب ملاك الموت
لقاه .. فى ناس معاه
فسألته لو ممكن ياخدننى
فى السفر الأخير ويّاه

عشان نلقى ملاك الموت
ومتخافشى مش هعمل صوت
فقالى انه مش فاضى
وان الموت مهوش راضى
يخدنا معاه
عشان ملقاش فى أرواحنا الغريبة حياه
نصيبنا نكون هنا فِ النصّ
ولا طايلين نعيش فى الموت
ولا طايلين نموت فِ حياة
ملاك الموت انا عاذرك
عشان ربّ العباد أمْرك
تجيب الروح من الأجساد
وانا منّى هتاخد ايه
مفيش ولا روح ولابتنجان
وانا راضى ومش زعلان
ولكن يا ملاك الموت أمانة عليك
لو شفت يوم واحد بيهرب م الخلاص
سلّم عليه ..
وقوله ان فى ياما خلق الموت لها أكبر منى
وان الحياة الحقّ أبدا
مش هنا