هنلعب بإيه !

هنلعب بايه ؟؟

حبايب ، وشايب ، وأولى وعجل

يا شيخ هيّا ديّا لعب تتلعب !

دى ماتت وعدّى عليها الأجل

هنلعب مصارعة ونلعب حروب

-        ممم .. برملة وميّه ؟؟

عاديّة .. عاديّة

بعُصيان وطوب

هنحدف بقوّة

ونهرب لبرّة

وكل اللى خافوا ..

هيتحبسوا جوّا

بنلعب أساساً عشان الهروب ..

-        مم بلاش المصارعة .. بلاش الحروب

مم .. هنلعب بايه .. هنلعب بايه

هنلعب عساكر .. بتمسك حرامى

انا هبقى ظابط

ورامى الحرامى

مم .. مفيش فيها ظابط .

وكلّه حرامى

مفيش فيها ظابط .. وكلّه حرامى !!

ماظابط أهو ..

ولابس جاكّيتّه عليها نجوم

مم .. حرامى  .. حرامى

معادتش عسكر بيمسك حرامى ..

بقت يا حبيبى ..

حرامى ، وحرامى

حرامى جبان مستخبّى فِ نجومه

بيسرق بعيد عن عيون البشر

، وواحد شجاع مستريّح فِ نومه

عشان مش بيخفى الحقيقة فِ صور

مم .. قوم يلا نلعب حرامى بقى

مممم .. بلاش الحرامى .. بلاش الحرامى

ممم .. هنلعب بايه .. هنلعب بايه

ألا صحيح ..

هوَّ النهاردة ايه !

مش النهاردة عيد ؟!

بلالين .. وهيصة

وبمب .. وعيديّة .. ونلبس جديد

مم ماهوش عيدنا دة ..

عشان احنا عيد ..

هنلعب مسدّس

وهنجيب بنادق

وهوّ اللى بادئئ ..

هروح أستخبّى ،

عشان امّا ييجى أنشّن عليه

وأضحك عليه ..

وهضحك عليه واقولّه صلاح ..

فيضرب عليه .. يعوّر عنيه

عشان الخميس اللى قبل اللى فات

موافش يدّينى اضرب شويّة من البندقيّة

وجاب طلقة فيّا

وخلانى فِ اللعب أكون اللى مات

فاضرب عليه ..

هنعلب بايه .. هنلعب بايه

هنعلب .. !!

هنضرب بايه .. نعوّر بايه

هنشتم بايه

بقى الشر بينهم دة حاجة عاديّة ..

انا اضرب عليك .. هوّ يضرب عليّا

خلاص يا بهيّة ..

مادام اللعب فِ الحضانة كدة

وادام اللعب فِ الشوارع كدة

وجوّا المدارس

على بعض نشتم نطلّع أسامى

مفيش فِ العساكر

ولا حتّى حارس

وكلّه حرامى

مادام اللعب فِ الطفولة كدة

فمين لمّا يكبر هيحضُن أخوه

ويرعى أبوه

ومين للمحبّة يلبّى النِدا

ومش عارفة ليه الحياة طافحة همّ !!

عيالك .. أهُــمّ

بيتعبّوا نار .. ومات الهزار

انا عايز أكبر .. عشان ابقى راجل .. وألعب قمار

قوليلهم يا سمرا .. يحبّوا الحبايب

ولمّا تجيلنا حلاوة وفاكهة .. نعين للى غايب

قوليلهم يا سمرا .. يحبّوا الحبايب

ومن فرْح أخويا أبطّل أغير

ونرمى البنادق ..

قوليلهم يا سمرا .. نبطّل نعايب

ع اللى بخير ..

يبقى هوّ اللى بادئ