لحظـة عجز

لحظة مالشارع ماسك قلمه بيكتب شعر

فرملة الباصّ بصوتها المزعج

قطعت حبل الفكر فِ راسه

ساب كرّاسه

وقام يتفرّج

راجل نازل م الأوتوبيس

ساند على عجّاز فى العجز أديله سنين

داس الراجل بالعجّاز علشان ينزل بشويش م الباصّ

السوّاق .. عايز يلحق كام ورديّة .. فداس بنزين

رعشة جدّى ما قدرت تثبت

راحت حانية جبينها لحكم العمر

وداق الراجل طعم الطين

وقف الشارع .. شاهد أخرس

شاعر أخرس

عاجز أنه فِ لحظة عجز الشعر

يردّ لصمته فِ مرة الدّين

قام الراجل ..

مسح الطين من وشّه

حاول يوهم نفسه تغشّه

بأنه شباب .. لسه شباب

شعره دة شاب .. لكن شاب

من كام يوم

كنت بنطّ من الأوتوبيس وأنزل وانا جارى

بنزل كيفى فِ أى مكان

بس أتارى

كل دة كان

قطر العمر صرخ فِ السارى

آه م العمر .. وآه يا زمان

مدّ الراجل

علشان يلحق فِ المستشفى الحجز

بصّ فِ وشّ الأرض

خبّى دموع العجز