لـــوحة

  1       

أنا أسمر .. وبسمرّ بزيادة

كل مارفع عينى فى الشمس اللى واقفة فوق نخيلك

 وبتحدّاها .. كل شروق

ومش لاقى سبب واضح

لكنى كرهتها جداً

يمكن لأن الشمس بتخبّى شعاع

طالل من الرسمة اللى دايماً

كنت بهديها لرموش عنيكى السمرا دول

أو .. لأنى كنت محتاج للسواد

علشان أكمّل لوحة ساكنة جوّا جسمى

لوحة هكتب منها اسمى

ليها عشقى .. وليها رسمى

ما أصلك أغلى من – كلمة

 2           

وبتعمّد اخانق فى جبال همّى

واوشوف دمّى

بلون أحمر .. 

منوّر صبحك .. اللى مات على ايديهم

  وصار ..  ضلمة
 

3           

بيتعجّب أبو دنيا اللى من أسوان

وأنا فرحان ..

وعقلى فى الشرود طاير ..

كأنى لقيت خريطة كنز ..

ليّا زمان ..

عليه داير

أول ما أشوف ضحكة براءة

بتجرى من قلبه على وشّه

ماليها بياض ..

أخيراً صافى يا أبيض

خلاص هنكمّل اللوحة ..

وفِ الألوان .. لنا حكمة

4        

وبعد ماخلّص الرسمة

بزور نيلك .. واشوف وشّه عليه بسمة

خلاص هنكمّل اللوحة

وبستنّى أنا ويّاه

واشوف نسرك شريد فى سماه

فى أرضك يا بهيّة تاه

ولوحتك بس دة .. ناقصاه

بنادى عليه .. مايسمعشى

فنيلك يحدفه بموجه ..

عشان يرجع .. مايرجعشى

فبفتح ليه انا صدرى

يشوف اسمك دة اكبر ضلع

بين رسمة ضلوع صدرى

يروح طاير على عنيكى ..

ويمسح دمعتك بايديه ..

ماعمرك يوم ما هنتى عليه

خلاص هنكمّل اللوحة

وعمرك تانى يا سمرا ..

مادمعة حزن من عينك ..

هتنزل وانتى مجروحة

واديه نسرك بيجرى بشوق فى حضنى

مالوانك على جسمى

وراها دفاكى وقت البرد

ماهو غيرك .. مالوش عشقى

ماليش غير الحبيبة أرض

بحبكّ حب ربانى ..

عشان نيلك دة ربانى

اعيش مظلومة .. مش ظالمة